NON DIRA SANTIAGORATEKO BIDEAK...
Salvador Allende
Eta Txileko zapaldueri
Nondik norat
doatzi
ihes
ala zeren
noren
bila?
Ihintzean garbitu
zango zikinak eta
lana beltzen artetik agertu
iguzki printze bakarrek
xukatuak
Hor gaindi ziren nahasiak
berexiak banatuak eta urrunduak
atzoko beren etxe txarretatik haizatuak...
Lanik bazutenez
ogi poxi bat baratxuriz perekatua
bular agertuen goseaz nigarrez ari ziren haurrak antzakatzeko
lur xerrenga bat bederen
bazutenez
fabrikatik lekora izerdi sano bat
bizkarrean behera senditzeko
nihork ez zakien
Ez, omen, Jaunak
Ez eta berek
zerengatik
mahai gainean zuten azken ogi kaskoa
nonbaiteko txakurrek eraman zioten
eta nolaz egun
beren emazteak eta beren gizonak eta beren haurrak
nahasiak berexiak banatuak
beren trapurik gabe
hor gaindi zoatzin
atzoko beren etxe txarretatik
botaiak
Ez, omen, Jaunak
nihork nihon ez zakien...
Alta
ez ziren ez
jende gaixtoak
burua apal zoatzin gizonak goizetan
argi xirrintean
fabriketara, bide egitera, lur
haitzurtzera eta emazteak ere burua apal
hori ere segurenik bestetan bezala
edo bezalatsu
haurrak troxatzera, jatekoa prestatzera
bi solas hauzokoekin egitera
eta asterian sua piztera
Ba, Jaunak, ba.
Kasu
beharba
ez ote zenez
egun batez, lanetik etxeratekoan
zuzentasun minak
elkarretaratu zituelakotz
Santiagoko plaza nagusian
huxtuz eta oihuz eta kantuz
holaxet hasi zirelakotz
eta askatasun indar bat hor
Santiagoko plaza nagusian
bildu zutelakotz eta berekin etxera eraman...
Izarreri begira
sua piztua zuen amatxik:
gizonak emazteak haurrak
bildu ziren
ez ziren ez jende gaixtoak
gau hartan esnean broskaturik
beren ogi kaskoa jan zutenak
eta belauniko
ohera joan aintzin
itxindueri begira
askatasuna kantatu zutenak
ez ziren ez
jende zitalak
izarren dirdiraz beren Herria
argitu nahiko zutenak...
Biharamunean
1973ko irailak 11
berek ere ez zakiten
nongo ekaitzak
bezperan amatxik piztu sua hil zioten
eta zerengatik
mahai gainean zuten ogi ondarkina
Txakurrek eraman zioten
eta nolaz iguzkia ez zitzaien agertu...
Hor gaindi zoatzin nahasiak
berexiak banatuak eta galduak
atzoko beren etxe txarretatik
desjabetuak...
Nondik norat
doatzi
ihes
ala zeren
noren
bila
nondik norat
haztamuka
erasian eta nigarrez...
Non dira non
zuk, Jauna,
ba ahal dakizu
non diren
Santiagorateko bideak...
1973.ko Urrian
