MANEX ERDOZAINTZI

Alesia estazionetik ateratzean

Lurpeko korridorean

Murru paratari finkatua

Emazte bat

Adinetako emazte bat...

Atzo ere ikusi zindutan

Bainan ez nintzaizun

Ohartu

Gaur bezala...

Tabako untzi bat eskuan

Eta hutsa

Atzoko jauntzi ber berarekin

Jauntzi zurpaila

Bainan atzo ez nintzaizun

Ohartu

Eta besteak bezala pasatu nintzen

Zure aintzinean... eta joan...

Gaur behako bat egin dizut

Eta pentsatu dut

Ene ama izaiten ahal zinela

Murru parata bati finkatua

Espaziorik gabe

Adiskiderik gabe

Jendartean galdua

Ene ama izaiten ahal zinela

Pilda hits horietan gaizki beztitua

Tabako ontzi bat ahurrean

Murru parata bati finkatua

Begiak lurreko malur guziez beteak

Ene ama izaiten ahal zinela

Eta nigar egin dut

Zure itxura neramala

Amari pentsatuz...