BAKARTASUNA
Airea: "Mutil koxkor bat"
Bakartasunak inguratu nau mendi gune hertsi huntan
Beti bezala inganagarri bere soaldi eztian;
Nahi nau hezi eta nolazpeit berekin adixkidetu
Bainan enetzat ez du begirik soa argi dezakenik
Ez-eta ere nere bihotza jabal dezaken elherik.
Maltzurkeriaz egun bildu nau nun nahi daukan sarean
Ihes doana baitu segitzen edozoin gorde tokitan
Irri karkailaz trufan bezala tinkatu nau hiltzeraino
Bainan enetzat ez du eskurik aski indar dezakenik
Ene burua inganatzeko ez du izanen ahalik.
Halarik ere lotsarik gabe bihotzeraino sartu zaut
Ez niolarik ideki nahi errabian beretu daut
Zauri zahar bat berritu baitaut bakerik ez izaiteko
Ixtant berean ezin egonak ezarri nau airaturik
Odola kexu gogoa ilun nabil burua galdurik.
Begiak zaizkit dolorez hetsi argiaren dirdirari
Eta zabaldu ezinbertzean inguruko itzalari
Mendi gorenak ilundu dira iruzkia gordetzean
Bidea galdu eta ez jakin zangoak nun zeri finka
Gorputz guzia hasi zitzautan hotz-ikarretan jauzika.
Bizi-nahiak bultatzen gaitu barneko indar oldean
Berritzen ere jotzen gaituzten gertakari gaixtoetan
Zerbait laguntza eskatu nahiz memento lazgarri huntan
Oihu handi bat eman-ahala bota nuen asperetan
Oihartzun botzak zautan bakarrik ihardetsi debaldetan!
