HEMENGO ELIZARI
Errepika 1
Eta gu ez gara libro
Ikusten duguna salatzera:
Herri zapaldua
Herri apurtua
Herri urkatua...
Eta gu ez gara libro
Sinesten duguna aitortzera:
Herri xutitua
Herri elkartua
Herri askatua...
Notable jauna Elizan soinulari
Gostuan dela nola ez da ageri:
Eskuak zalu aireak jotzeari
Begiak erne horko jendetzeari
Kasu eginez plantan egoteari
Badaki ere behatzen apezari
Irri bat lotzen aurpegi izkinari
Gogoz asmatzen ehun bat debrukeri!
Kalonje jauna elizan mintzalari
Talendu gaitza ba omen du ugari:
Hitz hautatuak noiz nola bederari
Balaka goxoz eskuin aberatsari
Maltzurkeriaz langile herrestari
Ederkikara lotzen da frantsesari
Deituz kartsuki puxanten Ortziari
Su bota dezon fededun bastartari!
Zenatur jauna elizan lendakari
Ahantzi ez da noizbait zela kantari:
Aintzin-gibelka lasai ibiltzeari
Ez baitzaio zer ohitua denari
Ele xuri-beltz ahalaz xarmegarri
Askiko zaio gure populuari
Behin lotu-ta lausengutza lanari
Nola eskapa Frantses-Espaņolari!
Obispo jauna hil-harrien zaindari
Thema gogorrez eman zen mezulari:
Axola handi betiko indarrari
Aulki goratik mintzo da jendeari
Nigar intziri enterramendukari
Hantxetan hara doan lehengoari
Mehatxu frango ta hanbat azpikeri
Gure herritar burrukalarieri!
Bankierro jauna elizan eskelari
Laņo-laņoki jartzen da otoitzari:
Eskuak bilduz luzean gorputzari
Begiak ņir-ņir goi bildutasunari
Estatu hortan hain baita hunkigarri
Ez da lotsati humiliatzeari
Bihotz barrutik eskatuz Jainkoari
Dezaion eman ongi eginen sari!
Jandarma jauna Elizan txixtulari
Bere gradoko lagunen ordezkari:
Sudurra luze krima senditzeari
Bidez-bidexka Ordrearen beilari
Nork egin duen zerbait tetelekeri
Ez da baratzen artaz notatzeari
Huxtu-lasterka hobendun ez denari
Milika-sino hauzoko sosdunari!
Makiņun jauna Elizan makilari
Uko egin du belaunikatzeari:
Urratsa zalu ibilki tratulari
Merkatu plazan nolako elekari
Izan daiteken gizon xuxenenari
Errainak hautsi ez zaio urdekeri
Haztamaztaka moltsa hanpatuari
Oheratzen da dei eginez loari!
Errepika 2
Baina libratuko gara
Ikusten duguna salatzeko:
Herri zapaldua
Herri apurtua
Herri urkatua...
Eta juntatuko gara
Sinesten duguna aitortzeko:
Herri xutitua
Herri elkartua
Herri askatua...
Notari jauna Elizan epailari
Jarraikia da igandetakoari:
Astegunetan segidako lanari
Neurrigabeko fortuna biltzeari
Gezur-ohointzaz hartzea duenari
Ez da gisala lege bihurrikeri...
Dohain ederrak ausarki eta jori
Agitzen dira holako batzueri!
Mediku jauna Elizan kontseilari
Ez da higatzen meza segitzeari:
Daki behatzen denekilakoari
Orok diote ez dela handikari
Solas goxoak eri den xaharrari
Ongi pagaraz kliantel kartsuari
Mia-miaka bular ingurueri
So baten sari neskatxa gordinari!
Nagusi jaunak Elizan predikari
Juntatzen dira fama onekoeri:
Gau-egunero beren zer egineri
Behar delarik belaunikatzeari
Izanagatik eginbidez ihaurri
Bihotz amultsu beharretan denari...
Tink hupatuak kapital bizkarrari
Ez dira lotsa etzidamukoari!
Zenbat holako Elizan saindulari
Eman dirade egiaren zedarri:
Jauntzi apainak usain on girgileri
Egunak oro lasai bizitzeari
Jende xumea aztaparka lurrari
Ezin eskapiz iheska hiltzeari...
Baina ondikotz jauneri kasta horri
Suerte on hau ez zaio lotsagarri!
Bertsu lerro hauk, kritika eta irri
Eskaintzen ditut hemengo Elizari:
Bota diotet ausarki biper gorri
Nahiz dakarten ahutra bat elorri
Izan laitezke askorentzat pizgarri
Gogo-bihotzez urratuz bide berri
Gerta gintezke lotuagoa elkarri!
Errepika 3
Eta libratuak gara
Ikusten duguna kantatzeko:
Herri xutitua
Herri elkartua
Herri askatua
Eta libratuak gara
Sinesten duguna ospatzeko:
Herri xutitua
Herri elkartua
Herri askatua!
Domintxainen 1977ko uztailan
