AMETS BAT ETA BESTE...
- Neure laguna, neure lagun izengabea,
Zendako habila begiak bustirik?
- Nondik dator haize epelaren pereka?
Sortu nindukan bizitzeko eta...
Neure begiak ez dituk argiari ireki
Gauak sortu nindikan eta...
Berean bildu nik eta neramak!
- Gauaren neure laguna, neure lagun izengabea,
Zendako habila begiak lanbrotan,
Egun hemen bihar beste nonbait
Mamu baten gisan?
- Nondik dator haize epelaren bustia?
Sortu nindukan bizitzeko eta garraitzeko...
Baina, amets batek nerabilak,
Egun hemen bihar beste nonbait,
Beti-ta-beti urrunago, gaurkotik haraindian...
Gauak amets batean sortu nindikan hain segur
Eta berean bildu nik eta neramak!
................................................
Neure bizia duk ezin kokatua
Aspaldian itze bat bilatu diat
Iltze bat gogorra eta zorrotza
Neure bizia duk ezin itzatua
Egun hemen bihar beste nonbait
Neure bizia duk harat-honerakatua.
Behin eta nik uste gero, askotan ere,
Amets bat egin diat
Euskal Herriko haritz bat hautatzea
Euskal Herriko ibar zola batean
Haritz sendo bat hautatzea.
Egunak
Eta ilabeteak
Eta urteak iragan zaizkidak...
Haritz bat ez diat aurkitu
Euskal Herriko ibar zola batean.
Behin eta nik uste gero, askotan ere,
Burruka guzien artetik eta atzetik
Amets bat egin diat
Euskal Herriko gune gorde bat hautatzea
Euskal Herriko ibar zola batean
Gune goxo eta baketsu bat
Itzalpean.
Ametsak berritu dituk
Eta joan
Ortzian lanoak bezala
Gauean egunak bezala...
Eta asteak, ilabeteak, urteak
Joan zaizkidak
Oroitzapen hunkigarriekin batean...
Gune gorde bat ez diat aurkitu
Euskal Herriko ibar zola batean.
Neure bizia dukek nonbait ezin lotua
Arkatz bat bilatu diat
Soaren pausa leku...
Bederen soaren pausa leku
Egun hemen bihar beste nonbait
Neure bizia dukek erro gabetua.
Alta
Ametsetarik landa
(Zendako ez ametsak bultzaturik?)
Erroak egin nahiko nintikan
Euskal Herriko ibar zola batean
Laharren artean
Han nonbait ixil gune batean.
Laharrek beti pusatzen dikeie
Arkatz inguruak zainduz
Baina
Lagunik ez diat aurkitu
Neure ametsen heinekoa
Neure amodioaren betekoa
Eta
Banabilak
Egun hemen, bihar hantxet, etzi
Ez dakiat non
Neure ametsen heineko
Neure amodioaren beteko
Lagun baten bila...
Arkatzekin eta laharrekin eta iturriekin
Eta haizearekin
Adiskidetua den lagun baten bila
Burruka guzien artetik
Burruka guzien atzetik
Bere izerdian iratzeen usaina dariona...
Eta
Banabilak
Euskal Herriko ibar zola batean
Han nonbait gune ixil batean
Haritzpe bat izanen delakoan
Neure intzirien kontsolatzeko
Eta beharba
Lagun bat ere
Hilen naizelarik
Neure gorputza
Lur pean gordetzeko...
........................................
- Neure lagun, neure lagun izengabea,
Iruzkia gorde ziguk
Euskal Herriko mendietatik urrun
Eta gure Herriaren lurra
Uste diat arrotzek beretu digutela
Eta beldur nauk
Ez ditugunetz sekulako galdu
Geure ibarrak
Geure haritzak
Laharrak, iturriak, gaztainadiak eta arkatzak
Geure odolaren beroa?
- Nondik dator geure lurraren intziria?
Nondik haize epelaren bustia?
Sortu nindukan bizitzeko eta garraitzeko...
Ametsak hartu nik eta berean neramak
Gauak eguna bezala
Burruka guzien harainditik
Euskal Herriko ibar zola bat
Aurkituren dutalakoan
Eta beharba
Lagun bat ere
Hilen naizelarik
Neure odol beroa
Euskal Herriko lurrean biltzeko...
Tolosan 1971ko hazilan
