MANEX ERDOZAINTZI

BIAK BAT

Uztailako gau eder batez

Etxeko ateatik jelgitzen

Ikusi nintuen etxeko jaun-andere gazteak.

Etx'aintzinean jarri baitziren argizaitiaren parrean

Besarka koropilatuz tinki-tinkia

Elgarren berotasun gozoan

Gau hartako ixiltasun eztian.

Biak bat:

Bi gorputz;

Bi bihotz;

Amodio batean!

Gogo batean!

Biak Eskual-Herriko ume.

Eta beren gogoa etxondoan hazia

Egiazko Jainko bakarraren erakaspenean

Arbasoen zuhurtzia zintzoan.

Biak bat:

Gizaki-aziaz sendo;

Jainko-aziaz berme;

Amodio batean!

Gogo batean!

Biak lurgintzan usatuak.

Laborantxako lan mota guzietan azkar.

Esku beltz horiek ditu gure Jainkoak maite:

Langilearen esku adretak, esku gogorrak!

Egun batez alorreko hesi ondoan

Elgar hitzeman zuten betikotz

Biek bat egitea haragi batean

Biak bat izaitea izaite batean

Lurgintzan bezal-bezala

Amodiogintzan

Biziaren urratsean

Izaitearen etorkian.

Betikotz biak bat:

Bi gorputz haragi batean;

Bi bihotz amodio batean.

Biziaren urratsean

Izaitearen etorkian

Jainkoaren nahian.

Geroztik biak bat daude.

Berek moldatu ohantzearen erdian.

Beren amodio-batasunetik sortu haurren erdian.

Jainkoak eman haurren erdian.

Biak bat heien hazteko, altxatzeko:

Gorputzeko bizian;

Arimako bizian;

Giza-semeen artean;

Jainkoaren aintzinean.

Heien arpegiak ezdu gezurrik

Are gutiago faltsukeriarik.

Heien begiak dira zeruko izarrak iduri:

Argi eta laņo: ņir-ņir bake distiran

Eta bihotza beti amodio-kantari

Giza-semeen artean

Jainkoaren aintzinean.

(1959-02-20)

<< Olerkien zerrendara itzuli

Gipuzkoa.net
2011 Kultura, Gazteria eta Kirol Departamentua - Gipuzkoako Foru Aldundia
Creative Commons