LARRAZKENA
-1-
Bazterrak bere jauntziaz buluzten dituen sasoina!
Mendi gaineko zuhaitzak hits daude:
Ostoak berde-gorail,
Addarak idor, iduri hezur xukatu batzu.
Noiztenka, lano petik eskapatu iruzki arrai batek
Perekatzen dituela
Eta iduri beilukete jatzartzen bezala direla.
Bainan haize ukaldi batek baderamatza
Bere oldarrean, firristan,
Errepika trixte batean...
-2-
Banoa oihanetan gaindi
Behatuz, zeruan gaindi, ziuntan haizeak baderamatzan lanoak;
Adituz zuhaitz kaskoetan osto bakarrekin
Haizeak emaiten duen Larrazkeneko azken musika zatia.
Lurraren gainean pausatuz ene urats pizua
Banoa sendituz lur bustiaren usain gozoa,
Zuhaitz zango luze buluzien artetik
Bakar eta ixil, iratze gorrietan gaindi.
Ba ote ditake heben trixteziarik?
Ba ote nindaiteke izan ilun, natura guzia buluzten ari delakoan
Neguko gauean, bere pausuaren hartzeko, indarren berritzeko?
Ez.
Banoa bidean gogolari...
Pentsaketa eginez
Guk, gizonek, behar gindukela ikasi
Gure ziunta izigarrian noiztenka baratzen...
Behar gindukela ikasi
Gure baitan metatzen ditugun ez-deuskerietaz buluzten...
Jainkoaren baitan pausuaren hartzeko
Nor berarentzat jarri duen denboran.
-3-
Larrazkena azi sasoina!
Laboraria "goizean goiz jeikirik, argia gaberik"
Badoa alor(r)erat, erreposki,
Behi parea aintzinean eta akulua bizkarrean.
Lurra irauliko du
Ildoak trunkostatuko
Mokorrak ahiarekin porroskatuko
Belar zikinak bilduko eta erreko
Lurra untsa lantueta
Azia ereinen eta pausuan utziko
Neguko gauean ozitu arte.
-4-
Larrazkena bildutasun sasoina!
Goizik beita iluna jeusten lurrerat
Familia guzia, xitak bere amaren hegalpean bezala,
Biltzen da supazter xokoan piztua den su beroaren inguruan.
Paderatra bat gaztaina ari da erratzen
Aneia ttipienak duela inguratzen.
Zaretik bakotxak bonetraka hartzen ditu
Eta bere usaiako xokoan ttottoturik maxta-maxta jaten
Aita eta Amak marduenak hautatzen dituzte
Ez dutelakoan hortz haundirik.
Guk aldiz, iddorenak maiteago.
Noiztenka, botoila kaskatu baso azantz bat
Zintzurrean behera doan arno bixi freskoaren tturrusta.
Gero, Ama xutitzen da eta bolatra bat esne,
Kafe ttintta batekin nahas, deneri emaiten
Gogotik hurrupatzen beitugu.
Orduan, untsa aserik, oherat joaiteko prest gira.
___________________
Larrazkena lurraren sasoina!
Larrazkena urtearen asteri gozoa!
Gizonarentzat bildutasun sasoina!
Beitoa lurreko bideetan gogolari
Eta zeru alde Jainkoaren otoizlari!
Livry-Gargan-en, 1958ko urriaren 20an.
