KLOTCHEREKO KURUTZEA
Larrazken hastapeneko
Asteri edertsu bat zen.
Zeru garbi urdina
Lanho petan gordea;
Mendi eta zelaiak,
Bazter guzi-guziak,
Pausu trankil batean,
Bake gozoenean.
Bakarrik firristan
Zeruko airean
Asteri ondoan
Freskuraren hartzen
Gustian zabilen
Bele beltzaun baten
Hegalda pizua.
Ene ganberan nindagon,
Liburuak bazterturik,
Burua akitua
Ikastea utzia.
Betan chutitu nintzen
Eta hasi ibiltzen
Ganberaren barnean
Horgo leku hertsian;
Leihorat hurrandu
Kanporat behatu
Zeruari buruz.
Choraturik kantuz
Egon nintzen luzaz
Betez nere botzaz
Egoitza guzia.
Bi begiak zabaldurik
Kanpaina ikertu nuen
Ta ikusi hebentik
Zuhaitz petan gorderik
Lo dagon urmaela
Dena baltsaz betea;
Entzun osto artean
Haizea zirrimolan.
Nere aintzinean
Ikusi orduan,
Harritu beinintzen,
Chut-chuta agertzen
Eliza aldean
Klocheraren puntan
Kurutze haundi bat.
Kurutzeari so'ta so
Mila pentsaketa eder...
Jainkoa gizon egin
Eta gutarterat jin;
Nahi izan du bizi
Gu bezala osoki:
Jasainez lan dorpheak,
Penak, nahigabeak.
Gure Jainko onak
Amodiozkoak
Egin du guretzat
Haur dohakabentzat
Ongia nasaiki
Sustut bereziki
Osasuna eman.
Kurutzeari begira
Mila erakaspen sakon...
Gizonen erremuan
Jainkoa bizi izan,
Nazareth'en gorderik
Machtruguntzan ichilik
Kaskoz eta eskuez
Hogoita hamar urtez;
Galilea'n gaindi
Predikari haundi
Gero abiatu
Beharrez kunplitu
Bere michionea
Aitak manatua:
Denak berpiztea.
Kurutzean irakurtzen
Mila erakaspen sarkor...
Odolez idatziak
Guretzat hoberenak:
Jesus hil izan zela
Gachtagin bat bezala
Kurutzean dilindan
Golgotha'ko mendichkan.
Besoak zabalik
Begiak argirik
Bihotzetik jelgi
Burrustan ugari
Jainkozko odolaz
Gizakizko uraz:
Denak Jainkoratu.
Larrazken hastapeneko
Asteri edertsu bat zen...
Zeru garbi urdina
Lanho petan gordea
Mendi eta zelaiak
Bazter guzi-guziak
Pausu trankil batean
Bake gozoenean.
Nere aintzinean
Ikusi orduan,
Harritu bainintzen,
Chut-chuta agertzen
Eliza aldean
Klotcheraren puntan
Kurutze haundi bat.
Kurutzearen oinetan
Otoitzño bat ezpainetan...
Ororen Jainkoari
Guziz ospetsuari
Lurrean, zeruetan,
Gizonen bihotzetan
Adiaraz goraki
Eresi bat ederki
Ichiltasunean
Bakartasunean:
"Agur, Jaun Goikoa,
Oi Soberanoa!
Bizi dohatsurat
Otoi Zure ganat
Bil gizakentea."
Gure lurreko egoitzan
Chut-chuta zeru aldean
Ikusi nuen argitan
Kurutze bat klocherean;
Ikusi ere...aurrean
Argi pindarren distiran
Ingurumen zabalean
Goiko alegrantzietan
Nazione guzietarik
Leihor urrungoetarik
Irustasunez beterik
Denak bat besarkaturik
Kurutzearen oinetan
Belauniko lur hotzean
Eskuak luze luzean
Gizakiak otoitzean.
Ichiltasunean
Bakartasunean:
"Ospe, Jaun Goikoa
Gure Nagusia!
Otoi zure ganat
Askatasunerat
Bil gizakentea."
Ichiltasunean
Bakartasunean
Denek, murmurikan
"Agur, gure Aita
Zeruan zaudena!
Otoi zure ganat
Bizi dohatsurat
Bil gizakentea."
"............rat
Bil gizakentea."...
Oiharzunak zoan
Mendi mazeletan
Urrun-urrunean
Zeruko lorian.
"La Clarté-Dieu" Orsay'n
1957ko
Urriaren 31'an
